نصائح من التجربة ديالي فتعلم اللغة الإنجليزية

السلام عليكم

هذه أول مشاركة لينا فالموقع حول موضوع تعلم الانجليزية اللي غانبقاو نهضرو عليه بزاف. منحتاجوش طبعا نكتبو مقدمة على أهمية هاد اللغة، حيت هي دبا لغة العِلم، وبلا بها، ميمكنش تحقق تقدم تقريبا فأي حاجة.

بديت - وبحال كولشي - درست هاد اللغة من التاسعة بحال جميع اولاد الشعب، وكنت غادي فيها مزيان  -ههه راسي اللي قال ليا راك مزيان- 4 سنين ديال التعليم فالمدرسة، كنت كنظن أنني مزيان فيها، وكنت كنسحاب راسي قادر ندبر أمور ديالي فيها، ولكن فأول محادثة ليا مع شخص كيتكلمها، وفأول مقال إنجليزي حاولت نقراه، لقيت راسي  مكنعرف والو. هاديك هي المدرسة ههه - كتعلمك بزاف، وتحفض فيها بزاف، وملي تجي لأول حاجة تطبيقية، كتلقا راسك ما عارف والو.

يمكن يفيدك :واحد من هذه الكتب الخمسة قد يغير حياتك 

كانت هديك صدمة، و موراها بديت كانتعلم، كنتفرج فيديوهات، وكنقرا شوية كتوبا، ولكن ما تحسنتش بزاف خصوصا فالكلام (تهضر معا شي واحد)، المشكلة كانت فأن التعلم كيكون ممل أحيانا خصوصا إلا كانت الحفاضة بزاف، الحفظ مشكل كبير بالنسبة ليا، حيت كيجيب ليا الملل بالزربة، إلا ما كانتش  شي حاجة مسلية، تخليني نتعلم ونستمتع فنفس الوقت. بحال البرمجة مثلا, أنت كتعلم وتطبق و كتشوف النتيجة قدامك، وهادشي ميمكنش يجيك منو الملل، وهادشي اللي خلاَّ البرمجة من أكثر المهن متعة.

مريت من بزاف ديال المراحل، حتى لقيت أفضل طريقة بالنسبة لي، حيت الأمر نسبي بزاف، كل واحد منا كيفضل طريقة.

الطرق مخدَّامينش  كنت كنتعلم بيها:

1- كنتفرج فيديوهات من الإنترنت ديال أي حاجة.

2- مدرتش فبالي شي هدف محدد (غادي نشرحو هاد النقطة بالتفصيل حيت مهمة جدا)

3- كنركز على واحد الجانب و كنخلي الجوانب الأخرى.

4- مكندمجش اللغة فحياتي اليومية.

5- كنخاف ندير الأخطاء

6- اعتقاد قديم، أن العلم خاصو يكون ممل، وإلا كنت كتعلم وكتستمتع فأنت مكتعلمش.

المرحلة ديال البحث:

فاش مليت من تعلم اللغة، جاني إحباط، و ماعرفتش  أشنو ندير، حتى شفت بعض العرب فالإنترنت، اللي كيدويو بالانجليزية بطلاقة، و ماعندهوم فيها حتا شي مشكل، فسولت راسي كيفاش  دارو ليها، وقريت بزاف على أفضل طرق تعلم الإنجليزية، وقريت بزاف ديال التجارب والنصائح ديال الناس اللي تعلموها ، ومن بعد بديت كنطبق دوك النصائح، واجمعت ليكم بعض النصائح اللي فادتني بزاف، وأنا دابا متبعها.

يمكن يفيدك :كيف تطور مستواك في الانجليزية مع اذكى روبوت 

النصائح:

1- فهاد الأيام ولاو آلاف ديال الفيديوهات التعليمية لكلشي تقريبا ... (كيف أقوم بغسل قطتي مثلا!) 
والإنجليزية خصوصا كاينين آلاف الفيديوهات، و الا ناوي تعلم اللغة الإنجليزية من يوتيوب، ودخلتي ووركتي على أي حاجة بانت ليك، فهادا مشكل، و مغاديش تتعلم تا سي لعبة، أفضل حاجة دائما هي تتبع أستاذ واحد، وملي تسالي كلشي عندو، سي لواحد آخر.

(هاد القناة وراها لي أحد الأصدقاء، وبديت كنتابعها، هاد السيد ممتع، و ما مليتش ابدا من مشاهدة الفيديوهات ديالو الرائعة، فادني بزاف)

https://www.youtube.com/user/JamesESL

2- دير شي هدف قبل ماتبدا فالتعلم، واش فراسك أن الإنجليزية علم كبير بزاف وفيها آلاف الكلمات، شي كلمات  مكتستخدمش فنطاق الكلام العادي والحوارات، اذن خاصك تدير شي هدف، مثلا كاين اللي بغا يوصل لمرحلة يقدر بيها يتحدث بطلاقة مع اللي كايهضرو بيها الأصليين، وكاين اللي بغا يوصل لمرحلة كتابة البحوث العلمية بيها، وغكاين اللي بغاها فقط يتعلم بيها تطوير الويب مثلا، كل واحد عندو منهج مختلف كيمشي عليه، دكشي علاش خاصك تحدد الهدف ديالك، و حاول تلقا  أفضل طريقة باش توصل ليه بأسرع وقت.

3- ما خصكش ملي تبغي تعلم الإنجليزية، تكتفي بالتركيز على جزء واحد فقط، واجب علينا نعطيو كل جزء حقو، الاستماع والكتبة، والقراءة، والتحدث، كولّْهوم مهمين بزاف.

4- إلا كيسحاب ليك أنك قادر  تحترف شي لغة بلا متفكر بيها، فأنت مخطئ! واجب عليك  تفكر بيها حتى تتقنها، وتولي بحال الناطقين بيها الاصليين، حاول تدمجها فحياتك اليومية، شقلب حياتك من العربية لإنجليزية هه، كل شيء كتشوفو بعينيك، قول سميتو بالإنجليزية، بحال شي دري صغير يلاه كيتعلم أسماء الأشياء.

5- أياك وأياك تخاف ترتاكب أخطاء، حيت ارتكاب الأخطاء من أساسيات تعلم اللغة، تكلم بطلاقة، و ما تديهاش فالاخطاء، ومعا الوقت غادي تعرف اغلاط ديالك وتجنبها. 

6- نشأنا فواحد البيئة، العلم واحد الحاجة مملة، معظم الشباب كيكرهو الكيمياء والفيزياء والرياضيات، وغيرها، مع أن هذه المواد رائعة، ولكن المناهج الدراسية هي اللي مملة، وطريقة التعليم فالمدارس أصلا كتعتمد على الملل باش توصل المعلومة، ولات عندي واحد القناعة جديدة، هي أن العلم جميعه ممتع، وإلا شعرتي بالملل فاعرف أنك كتعلم بطريقة غلط، و خاصك تقلب على طريقة ممتعة أكثر باش تتعلم.

وفالنهاية كنطلب منكوم جوج ديال الحوايج:

1- افرق ما بين الإنجليزية والعربية، ما تقولش (سير سيرشي عليها فغوغل وغتلقاها، والا لقيتيها براكتيسي شويا) هادي قصة حقيقة. هادشي ممزيانش، حاول تجنبوه ما أمكن،  يانقولها بالعربية، يانقولها بالإنجليزية، أما ندمج فهذا غير مقبول بتاتا.
2- الإصرار ثم الإصرار، فهو أهم حاجة، و بلا بيه ميمكنش ليك تقدم ولاحتى شي شبر واحد.
كانتمنا تكونو ستافتو بزاف . عارف كاينين ناس تبارك الله محترفين و بغيت نسمع التجارب ديالكوم و لما لا نديرو عليها موضوع حصري فالموقع اللي لكم و اليكم ..
شكرا بزا و تحية لكم ...

#انجليزية #كيفاش_نتعلم_الانجليزية #English