هل أنت مثقف؟
هاد السؤال تقريبا كل واحد كيسول راسو عليه، واش أنا مثقف ولا لا؟ وكيفاش نولي مثقف؟واش ايلا قريت روايات بزاف غنولي مثقف؟
واش ايلا جبت كتوب ديال معلومات عامة و جلست نحفظ فيهم غنولي مثقف؟
واش ايلا كنت غامض وكنقول كلام ممفهومش هاكا انا مثقف؟
.
الحقيقة هاد الموضوع كيتوقف على مفهومك للثقافة و كيفاش كتعرفها، الثقافة عمرها ما كانت معلومات عامة، ثقافة الكلمات المتقاطعة كيفما كيسموها العلماء.
بكل بساطة إنت ممحتاجش إطلاقا تعرف طول نهر المسيسبي أو عرض نهر الأمازون باش تسمى مثقف. هادي معلومة موجودة فالكتب.
يمكن يفيدك: كيفاش تزيد الثقة ديالك فراسك
الثقافة الحقيقية هي اللي كتشكل فكرة عندك وكتغير الوعي ديالك، الثقافة الحقيقية هيا اللي تخليك تحترم حقوق الناس وحريتهم وآرائهم الشخصية.
ايلا الثقافة مغيراتش فيك شي حوايج ولا وضحات ليك فكرة أو زاتك الثبات على شي مبدأ فهنا كتكون معندهاش قيمة.
لو قرأت ألف كتاب على العدل والحرية وإنت مازال مكتحترمش حق الأنسان فالحياة أو كتشوف إن "شي وحدة" خايبة بسبب مظهرها أو شي واحد خاصو يموت نظرا لأفكارو ... أو مازال كتدافع على هادوك اللي كيديرو دكشي فهديك الثقافة و هادوك الكتب اللي قريتي غير ضيعتي فيهم الوقت.
التفاحة كلنا كنشوفوها ولكن نيوتن بوحدو استخلص منها قانون الجاذبية.
كذلك الكتب كلنا كنقراوها والمعلومات كلنا كنعرفوها ولكن البعض كتغير حياتو للأفضل والبعض كيبقى حالو كما هو عليه وهادا هو العلم الذي لا ينفع.
انتهى المقال كانتمنا تكونو ستافتو شويا ... كالعادة اللي عندو شي إضافة أو تعقيب أو سوال فمرحبا بيه ... كيسرنا نتناقشو معاه ونفيدو ونستافدو من بعضياتنا ....
ليست هناك تعليقات:
إرسال تعليق