كيقول العالم غاليليو " ميمكنش ليك تعلم شي واحد أي حاجة، ولكن نتا فقط كتساعدو باش القى المعرفة داخل نفسه"، من قبل كان التعليم صعيب نوعا ما حيت الا كنتي باغي تعلم شي مجال خاصك تاخذ دورة فمؤسسة تعليمية خاصة أولا فشي معهد و تخلص بزاف ديال الفلوس دون الخروج بالفائدة الحقيقة اللي تمنيتها، حيت الا مقتلكش الملل من طريقة التعليم غيقضي عليك الصبر.
اليوم، بفضل الثورة اللي كاينة فالقطاع خصوصا مع ظهور نظام "MOOC" او التعليم المفتوح عبر الأنترنت فإنت مغتحتاجش باش تضيع وقت كبير في التنقل ما بين المؤسسات التعليمية، بإمكانك تعلم غير فوقت الفراغ ديالك و غير فداركوم ههه، فقط غتحتاج إلى حاسوب، أولا هاتف، و أنترنت !.
جمعنا ليكوم و احد اللائحة من أفضل 25 موقع باش تتعلم شي حاجة جديدة كل نهار
قبل ما تبدأ التعلم فقط غتحتاج أنك تتحدى راسك وتتعلم شي حاجة مفيدة تفيدك فحياتك الشخصية والمهنية إلا ما كانش اليوم غيكون فالمستقبل بالتاكيد، إلا مجعلتيهش عمل بالنسبة ليك على الاقل ديرو موهبة كتستافد منها فوقت الفراغ ديالك، هذا من شانو يغير شخصيتك ويخليك أكثر سعادة وإنتاجية بشكل عام.
باش نساعدوك تبدا، فهادشي هاك هاد المواقع اللي غتبرعك بداكشي اللي كتوفرو ليك
1. Lynda.com : موقع دخل ليه اكثر من 4 ديال المليون شخص حول العالم خذاو فيه دورات تكوينة.
2. Google World Wonders : إستكشف مع جوجل العالم القديم والحديث من حيث الثقافة ونمط المعيشة، وتعرف على تاريخ أي حضارة بغيتيها.
3. CreativeLive.com: فيه بزاف من الدورات المميزة وبشكل مجاني كتنتظرك مخاصكش تضيعها.
4. Hackaday: غتعلم فيه العديد من المهارات وغتعرف بزاف ديال الحقائق المذهلة اللي كاينة فهاد الموقع.
5. MindTools.com : كيتيح ليك هاد الموقع باش تتعلم مهارات خاصة بالإدارة والقيادة وريادة الأعمال و كيضم الألاف ديال الدورات اللي كيقدموها أساتذة مختصين.
6. Codecademy : غتعلم فكود أكاديمي بزاف ديال لغات البرمجةمنهوم جافا و PHP و بيثون بواحد الصيغة تفاعلية زوينة ممتعة.
7. EdX : فيه الآلاف من المحاضرات من أرقى الجامعات ديال العالم وفالعديد من المجالات .... التقنية و التعليم والإقتصاد وصولا إلى أسلوب الحياة.
8. Platzi : الا بغيتي تحصل على دورات إحترافية فالتسويق الإلكتروني، التصميم، البرمجة فهاد هو الموقع المناسب ليك ............ ..
9. Big Think : غادي تقرا بزاف من المقالات وغتشاهد العديد من الفيديوهات واللي غتخليك شخص أكثر ذكاء.
10. Craftsy : للفتيات هادا هو المنجم الذهبي ديالك ، غتعلمي فيه بزاف ديال المهارات فالطبخ و الخياطة و الحلويات، كيقدموه أساتذة و كبار الطباخين فالعالم.
11. Guides.co: كيتعتابر هاد الموقع من أكبر الأدلة الموجودة على الانترنت كيضم العديد من المواضيع اللي تقدر تحسن المهارات ديالك و تصقل الشخصية ديالك.
12. LitLovers : فيه الكثير من الدورات ديال الكتابة والأدب والشعر والقصائد، الموقع اللي تحول من واحد النادي صغير ديال الكتب، لموقع ضخم كيحتوي على بزاف ديال الدروس والدورات المفتوحة فابور.
13. Lifehacker : هاد الموقع كيتعتابر من أفضل المدونات الموجودة على الأنترنت كيحظى بمتابعة كبيرة نخليوك تكتاشفو بنفسك!
14. Udacity : موقع مختص فتعليم البرمجة بطريقة المحاضرات على يد الخبراء وأساتذة الجامعات، و كيوفر الموقع على العديد من اللغات البرمجية حسب المستويات، و كاينين أيضا دروس متقدمة الى بغيتي تحسن المستوى ديالك.
15. Zidbits : مجموعة عظيمة من الحقائق والأسرار ديال العلوم كتنشر على هاد الموقع، بالاضافة الى أخبار غريبة يقدر ميصدقهاش العقل ديالك لكن هي موجودة فعلا.
16. TED Ed : أكثر من 190،000 درس و 11 مليون سؤال تمت الإجابة عليه من طرف الخبراء، هاد الموقع التعليمي الأول من نوعه غيساعدك بزاف كيجاوب على الكثير من الأسئلة اللي كدور في راسك.
17. Scitable : العلوم شي حاجة زوينة ورائعة، و لكن مع ديك الطريقة ديال التعليم كتولي شي حاجة كيكرهها الناس كاملين، مع هاد الموقع مغيبقاش الملل فدراسة العلوم. كيوفر ليك الموقع بزاف ديال الدروس فمجال علم الوراثة ودراسة تطور الكائنات الحية والنباتات و بزاف ديال المواضيع العلمية الراقية.
18. ITunes U : بزاف ديال الدروس من جامعة هارفارد كاينة على هاد التطبيق المقدم من آبل و اللي متوفر للآيباد و الماك.
19. Squareknot : الكمية ديال الدروس الإبداعية اللي كاينة فهاد الموقع غتجعل منك شخص مختلف.
21. FutureLearn : أكثر من 3 ديال الملايين ديال المستخدمين كيتلقاو دروس فمجالات بحال الطب والأحياء والتاريخ والإنسانيات واللي زوين أنك غتاخذ شهادة إتمام للدورة اللي غتدرسها، ماشي التقنية بوحدها اللي كتعلمها بشكل ذاتي ..
بزاف ديال المجالات يمكن ليك تدرسها فالأنترنت.
22. One Month : فشهر واحد هاد الموقع كيخليك تلتازم بتعلم مهارة جديدة كل نهار، و فظرف شهر غتلقا راسك تعلمتي بزاف ديال المهارات بإمتياز.
23. Khan Academy : أكاديمية خان غنية عن التعريف حيت هي الموقع الأول فمجال التعليم عبر الأنترنت، يمكن ليك تستاغل الفرصة واتسجل فابور فالأكاديمية وتتعلم شي حاجة جديدة كتفيدك فالمستقبل.
24. Highbrow : خدمة إيميل كترسل ليك كل نهار مجموعة من الدورات مكتجاوزش المدة ديالها خمس دقايق فالعديد من المجالات.
25. Spreeder : هاد الموقع غيعلمك كيفاش تحسن القراءة ديالك للكتب و غيساعدك على تسريع القراءة والخروج بالفائدة الكاملة اللي ميمكنش تمحى من راسك، إختار شي كتاب و إقراه بشكل مختلف مع هاد الموقع الرائع.
فالختام كيقول الزعيم نيلسون مانديلا : “التعليم هو أقوى سلاح يمكن ليك تستخدمو باش تغير العالم”، مكاينش شي سبب يمنعك باش تتعلم شي حاجة،سوا كانت مهارة عمل أو هواية شخصية ممتعة أو لغة جديدة!
بلا شك عندك شي موقع زوين كتبعو و كتعلم منو شي حاجة مفيدة ؟
عندك شي تجربة مع أي موقع ذكرناه فالمقال ؟ عاود لينا عليه!
عندك الحق فالتعليق هه بكل فرح.
ليست هناك تعليقات:
إرسال تعليق