الضغوط ديال الحياة كتخلق عند بزاف منا شعور سلبي، بعض المرات كنستاطعو نواجهوه، وفأحيان أخرى كيغلبونا هاد المشاعر السلبية، هاد المقال الجديد علي ويكي كيفاش غيوضح ليك 9 ديال الطرق باش تخلص من دوك المشاعر السلبية.
قليل فين كيدوز شي نهار بلا متراودنا فيه بعض المشاعر السلبية، وهاد المشاعر مكتقتاصرش فقط على الحزن أو الضيق، حيت حتى القلق و التوتر و الخوف كلها مشاعر كتولي سلبية إلا سيطرت على التفكير ديالنا أولا تسببات فتعطيل القدرة ديالنا على العمل وممارسة شئون حياتنا اليومية.
1- الكتابة
إلا جاتنا الفرصة نحكيو لشي واحد دكشي اللي كنحسوا به، كتبقي مسالة تنظيم الكلام والبدية الصحيحة شي حاجة صعيبة، ولكن معا الورقة والستيلو بوحدك ماتحتاجش شي جهد إضافي، فقط خود الورقة واكتب دكشي اللي بغيتي بأي لغة، و بأي لهجة، بأي خط، جرب هاد الوسيلة باش تخرج دوك المشاعر اللي كتسيطر عليك وكتولي سيء المزاج.
2- التسجيل الصوتي
ومن زاوية أخرى، كاينين بعض الناس مكيحملوش الكتبة بأي شكل من الأشكال، فالبديل الموازي هو بلا شك التسجيل الصوتي، والأمر كيتطلب منك غير تجلس بوحدك مع تلفونك وبدا تسجل، واحكي دكشي اللي بغيتي بأي طريقة وخود الوقت الكافي، وما توقفش حتى تحس بأنك وصفتي داكشي اللي كتشعر بيه كامل وتخلصتي منو تماماً. اخلي التلفون ديالك وارجع لحياتك الطبيعية، و اسمع فاليوم التالي دكشي اللي سجلتي وفكر فالأمر، واش كان دكشي فعلا كيحتاج منك كل هاد العناء والضيق أولا كان غير حاجة بسيطة.
3- الجهد البدني
افضل حل بالنسبة ليا, كنأمن بشدة ان المجهود البدني عندو قدرة كبيرة على تفريغ الطاقة السلبية من الإنسان، و غتلقا بزاف ديال الناس كيمارسو العلاج النفسي بلا ميعرفوا السر ديال الرياضة، ممارسة الرياضة مفيد بزاف للتخلص من المشاعر السلبية وعندها عامل قوي جداً فتحسين المزاج.
4- شي حاجة كتبغي تركيز
كاينين بعض الأنشطة البسيطة اللي كتبغي تركيز ديالك، ملي كتمارسها كتفصلك على الأفكار ديالك والتركيز ديالك كامل كيولي منصب حولها بحال تسيري السبابط، او تصلح الملابس، او تخمال الدار، مشي مزاح هادا غير جربها بنفسك وقل لينا كيف كان الشعور ديالك.
5- جلسات الدعم النفسي
كيحتاج الإنسان لبحال هاد المجموعات اللي فيها واحد الجو من السرية والخصوصية واحترام مشاعر الآخرين، حيث كيجتامع واحد العدد ديال الناس فشي بلاصة باش يحكي كل واحد منهم المشاعر ديالو، و كيختار شي واحد من الناس اللي حاضرين و كيخاطبو ويتشارك معاه المشاعر ديالو فقط بهدف الحكي والمشاركة.
6- الفضفضة
قلّب على شي واحد كترتاح ليه و داير فيه الثقة، وعاود ليه دكشي اللي كتعاني وربما تقدر تلقا الدعم والمشاركة عندو.
7- الصراخ
بعض الناس مكيقدروش يعبرو على روسهم بحرية أو يوصف دكشي اللي كيحسو بيه، وللأسف هادي هي طبيعتهم و صعيب يبدلوها، هاد النوع من الناس كيعاني بزاف، دكشي علاش كتبقى المشاعر السلبية محبوسة عندهم و كتنكد عليهم حياتهم، وبالتالي فالصراخ بصوت عالي من الوسائل الفعالة فالتخلص من الطاقة السلبية.
8- شي دوش بالماء بارد
من الطرق البسطة باش تخلص من المشاعر السلبية هو تاخد شي دوش بالماء بارد، الماء عندو مفعول سحري فجسم الإنسان، خود القرار و ديرها وغيتحسن المزاج ديالك.
9- تمشا شويا
ملي تحس بالضيق، اخرج من البلاصة اللي أنت فيها و سير لشي بلاصة مفتوحة، تنفس الهواء العليل و النقي، تجنب تركب سيارة أو أي حاجة من المواصلات، سير غير على رجليك، تمشى حتى تشعر بالتحسن أو تحس بالعيا عاد رجع لداركوم.
حتا أنت لابد يكون عندك طرق ديالك خاصة باش تخلص من المشاعر غير المرغوب فيها، عاود لينا عليها شويا ...
شكرا و الى اللقاء فشي موضوع اخر ان شاء الله ...
ليست هناك تعليقات:
إرسال تعليق