أجي تفهم فعلم النفس

اشنو هو علم النفس

 علم النفس هو واحد العلم عميق ، بزااف دالناس كيبغيو يقراو و يعرفو فيه و لكن نظرا لصعوبته و تعقيده ماشي أي واحد كيصبر و  يقرا فيه و حتى الناس اللي كيقراو عليه ماشي أي واحد ممكن يفهمو بالمعنى الصحيح ....

داكشي علاش الهدف من فقرتنا الأسبوعية هو التعريف ببعض المعلومات الشاملة و المهمة اللي خاص تكون مسبقا فذهن أي شخص بغا ينفتح على هاد العلم و أول سؤال غادي نبدا بيه  و اللي هو :

- شنو فالفرق مابين أخصائي نفسي و طبيب نفسي و أنا غادي نضيف مصطلح آخر و هو محلل نفساني ...

الفرق ما بين هذا المفردات هو اختلاف فالتوجه الجامعي ...
بمعنى ؟؟ 

 أن الأخصائي النفسي هو واحد الشخص اللي تكون فكلية العلوم الإنسانية و الإجتماعية و اللي كتسما و غير فالمغرب بوحدو بكلية الأداب و العلوم الإنسانية الشيء اللي يخلي الناس يعتاقدو أنا علم النفس أدب   المهم ما علينا ... هاد الشخص باش يولي أخصائي نفسي كيقرا خمس سنين ... 3 سنوات إجازة و سنتين ماستر فتخصص اللي بغا و على حسب التخصص كيقدر يفتح عيادة و لا لا و فالمغرب عندنا فقط و الأخصائي فعلم النفس الإكلينيكي هو اللي عندو الحق يفتحها هادشي قانونيا أما فالأصل خاص يكون عندو تجربة فهاد الميدان باش يقدر ينجح فالعمل دياله .

أما بالنسبة للطبيب النفسي فهو شخص اللي قرا 8 سنين طب عام  وعاد من بعد كيدير تخصص فالطب النفسي أربع سنوات أو أكثر 

 أما بالنسبة للمحلل النفسي فممكن يكون فالأصل طبيب نفسي أو أخصائي نفسي و كيقرا التحليل النفسي لمدة سنتين أو أكثر و كيخضع حتى هو للتحليل النفسي باش يتنقى من جميع الشوائب النفسية و يكون أقرب للموضوعية اللي كتساهم فأنا العلاج يكون ناجح

 دمتم في رعاية الله هذا كان تقديم مبسط للفرق ما بين المصطلحات و إن شاء الله الأسبوع القادم نتحدث على الفرق ما بين علم النفس و علم الاجتماع و كيفاش ممكن نستافدوا من علم النفس فحياتنا اليومية إذا كانت عندكم أسئلة أخرى فمرحبا
بكم و بأسلتكم غادي نكون سعيدة بالإجابة عليها