خليونا متفقين اننا كمغاربة ابدينا نهتموا بالفورمة دون التطرق فاسباب عمل الفورمة عند كل واحد حر يا اخوان…
المهم انه لو كنتي ناوي تدير لاصال سواء الجيم أو الحديد أو ... أقرا هاد الكلام اللى تحت ...
1- اشرب قهوة كحلة مغلية مع شي نص موزة البانان قبل التمارين باش تساعدك فالحرق وتكتسب طاقة قبل التدريب.
1`- متاكلش قبل ماتمشي باقل من ساعة… حيت لو درتي هاكا غتمشي لاصال تنعس ماشي باش تتريني
2ّ- ملي تكون كتجرى على التريدميل فأنت ماشي داخل الأولمبيات و غتحطم رقم السرعة القياسى 😃 حاول ترفع السرعة بالتدريج و تنقصها بالتدريج….لو يالاه بديتي دقيقتين على سرعة 3 و دقيقة جري على 5
3- الماء من أهم الحاجات اللى متنساهش وانت فلاصال خليه دايما معاك حيت كيساعد في الحرق و لكن اشرب جغمة واحدة بين كل تمرينة والتانية ماتديرش ديك الخدمة ديال السحور فرمضان وتكمل القرعة جغمة واحدة
4-غتلاقا مع ناس غريبة فلاصال وغتلاقى ناس من نوعية ( انت بحال هاكا كتريني غلط… كاين واحد يتريني chest بحال هاك… انزل دراعك اكتر …
-انت كتريني غير 5 كيلو علاش العب ب200 أحسن!
= علاش ماتجيش تتمرن انت بلاصتي احسن
😌. 5-المكملات ماشي أي حاجة لقيتها تاخدها لازم تكون عارف لاش باغي توصل و تتبع مع المدرب حتى هو ..
6- المكمل أو البروتين ماشي شي حاجة سحرية … يعني ماشي شرط أنه بوحدو غيردك فورمة لازم تحكم فماكلتك معاه و تمارينك
7-الريجيم ماشي معناه أنك متاكولش بتاتا ولكن كيعنى تقلل الدهون فماكلتك.
8- العزيمة مهمة جداً حاول دايما تمشي مع صحابك اللي مهتمين ومكيغيبوش بزاف
9- مكيناش شي حاجة اسمها الرياضة و الـGــارو… حاول تاخد لاصال حجة انك تقطع الـGــارو و الشيشا والحشيش ....
10-فالنهاية بغيت نقولك أنك غتكون فخور جدا ملي تنجح فمهمتك وتولي عندك فورمة ولكن ها العار ملي تولي هاكا متبوستيش تصورتك كل شوية فالفيسبوك وشوفوني راني وليت صحيح و شي حاجة بحال هاكا.
وصلنا لنهاية المقال اللي عندو ما يضيف يتفضل مشكورا .. شاركوا معانا تجاربكم ونصائحم للناس اللي بغاو ايديروا لاصال ...
ليست هناك تعليقات:
إرسال تعليق